Tovolahy varira 23 taona, nalain’ny dahalo nitam-basy an-keriny – Midi Madagasikara


Raha nahoraka tany amin’ny faritra Atsimo Andrefana, indrindra tany amin’ny distrikan’i Toliara II, ny halatra sy fakana an-keriny zaza varira teo aloha, dia lasa mahazo laka indray izany any amin’ny faritra Ihorombe ankehitriny.

Tovolahy varira iray sahabo ho 23 taona eo no nisy naka an-keriny ny 6 septambra lasa teo, tokony tamin’ny 10 ora sy sasany alina, tao an-tanànan’i Beraketa Malio, kaominina ambanivohitra Andohan’Ilakaka, distrikan’Ihosy. Taorian’izay, niara-nisalahy avy hatrany ny mpitandro filaminana sy ny fokonolona any an-toerana nikaroka an’ity tovolahy, ka mpaka an-keriny 12 lahy no tra-tehaka azo sambo-belona niaraka tamin’ny basy roa. Ary tafaverina soa aman-tsara eo anivon’ny fianakaviany kosa ilay tovolahy varira nisy naka an-keriny. Naratra ny vatany iray manontolo,  satria nampijaliana izy ary zara raha nomen’ireo dahalo sakafo tamin’ny fotoana nitazonana an-keriny azy. Raha ny fanazavana azo, anaovan’ireo malaso sorona hanamasinany ny ody ratsy matetika no hakan’ireo olon-dratsy an-keriny olona na zaza varira (Soba na albinos), satria mihevitra ireo malaso fa manana hery manokana na miafina ny varira.

Eric Nahoda





Source link

Laisser un commentaire

Votre adresse e-mail ne sera pas publiée. Les champs obligatoires sont indiqués avec *